بعد 7 سنوات.. والدة شاب مختفي قسريا تطالب بالكشف عن مكان اعتقاله

قال مركز الشهاب لحقوق الإنسان إنه في ذكرى مولد الشاب الحسيني جلال الدين الحسيني 24 عاما، المختفي قسرا منذ 7 سنوات، أرسلت والدته رسالة لفقدها ابنها منذ أن كان في السابعة عشرة من عمره وجاءت الرسالة كما يلي:

“السلام عليكم ورحمة الله وبركاته، ابني حبيبي وحشتني أوي ونفسي أشوفك واطمن عليك..

إن شاء الله يوم الإثنين القادم 12 سبتمبر هو عيد ميلادك ال24 منهم آخر 7 سنوات وإحنا مش عارفين انت فين كل اللي عارفينه إن الأمن اعتقلك يوم 25 مايو 2016 الصبح ومن يومها وإحنا هنموت ونعرف مكانك ونشوفك أكيد شكلك اتغير في الست سنوات وثلاث شهور وتسع أيام قادر ربنا يجمعنا بك في اقرب وقت يارب وتكون معافى في صحتك وبدنك وترجع لحضني ياحبيبي اللهم رده إلينا سالما معافى يارب العالمين.

رسالة إلى كل من يستطيع مساعدتي في رجوع ابني إلينا ده ابني الوحيد رزقت به بعد 13 سنه مختفي من ست سنوات وثلاث شهور وتسع أيام ده ابني الوحيد ياريت اللي يقدر يساعدني في إني الاقيه قلبي محروق عليه كان في ثانوية عامة بس للأسف اختفي قبل الامتحانات بأسبوع نفسي يرجع واطمن عليه تخيلوا كرب بعيد عني لما اختفى كان 17 الآن بدانا 24 احسن أيام عمره لما بشوف أصحابه كبروا وشكلهم اتغير بقول أكيد هو كمان كبر وشكله اتغير من الطفولة للشباب بترجي اي حد يقدر يساعدني إني الاقي ابني ميتأخرش نفسي أشوفه واحضنه وأتمني من القائمين على اعتقاله الرحمة بأم فقدت ابنها الوحيد ما ليش غيره أنا عندي 57 سنه ونفسي أشوف ابني أرجوكم ساعدوني إن ابني يرجع ولكم جزيل الشكر”.

من جهته أدان مركز الشهاب لحقوق الإنسان جريمة الإخفاء القسري بحق الشاب، وطالب بسرعة الكشف عن مكان احتجازه و الإفراج عنه.