بعد 1100 يوم خلف القضبان.. زوجة الباقر: مفيش كلمات توصف القهر

قالت نعمة هشام، زوجة المحامي الحقوقي المحبوس محمد الباقر، المدير التنفيذي لمركز عدالة للحقوق والحريات: “النهاردة عيد جوازنا السابع أنا وباقر ،3 سنين منهم قضاهم في السجن بعيد عني.. بشوفه 6 مرات بالكتير في السنة”.

وأضافت نعمة هشام عبر حسابها على “فيسبوك” مساء الأحد: “مفيش كلمات توصف القهر اللي جوانا.. آخر جواب لباقر مؤلم جداً، مش بيتكلم عن نفسه خالص.. بيتكلم بس عني أنا ووالدته وأخته بس .. وبيحكي عن أد إيه حاسس بألمنا، وبيحكي عن ذكرياته عن طريقة كل واحد فينا في التعامل مع الحزن والألم والضغط النفسي، عشان يحسسنا أنه جنبنا وحاسس بكل واحد فينا مهما نحاول نبين أننا جدعان وكويسين أدامه”.

وتابعت: بيوعدنا إننا مش هنشوف حزن تاني لما يخرج، وإننا كلنا هنروح نتعالج نفسياً وهنعيش حياة سعيدة مع بعض”.

وختمت منشورها قائلة “وجع قلب مالهوش حدود والله”.

ويكمل المحامي الحقوقي محمد الباقر، الاثنين، 1100 يوم خلف القضبان منذ إلقاء القبض عليه وحبسه في سبتمبر من العام 2019 على ذمة القضية 1356 لسنة 2019 حصر أمن دولة.